पंतप्रधान मोदींच्या कार्यकाळात हिंदू अस्मितेचे जतन, तुष्टीकरणाच्या राजकारणाला पूर्णविराम: नितेश राणे
सिंधुदुर्ग /राजू तावडे
केंद्र सरकारमधील मोदी प्रशासनाच्या यशस्वी वाटचालीचा लेखाजोखा मांडताना, २०१४ पूर्वीच्या तुष्टीकरणाच्या राजकारणाला पूर्णविराम मिळाला असून देशात हिंदू अस्मितेचा उदय झाला आहे, असा दावा भाजपचे नेते आणि सिंधुदुर्ग जिल्ह्याचे पालकमंत्री नितेश राणे यांनी केला. भारतीय जनता पक्षाच्या वतीने आयोजित पत्रकार परिषदेत ते बोलत होते.
भाजपचे राष्ट्रीय अध्यक्ष आणि प्रदेशाध्यक्ष रवी चव्हाण यांच्या सूचनेनुसार या पत्रकार परिषदेचे आयोजन करण्यात आले होते. यावेळी नितेश राणे यांनी पंतप्रधान नरेंद्र मोदी यांच्या नेतृत्वाखालील कार्यकाळातील विविध निर्णय आणि सांस्कृतिक बदलांवर सविस्तर प्रकाश टाकला.
सांस्कृतिक राष्ट्रवादाला प्राधान्य
पत्रकार परिषदेत बोलताना नितेश राणे म्हणाले की, २०१४ पूर्वी देशात केवळ अल्पसंख्याक व्होट बँकेचे राजकारण सुरू होते आणि सरकारी योजना आखताना बहुसंख्याक हिंदू समाजाचा विचार दुय्यम ठरवला जात असे. तत्कालीन राज्यकर्ते धार्मिक स्थळांना भेटी देणे किंवा कपाळावर टिळक लावणे टाळत असत. मात्र, २०१४ नंतर हे चित्र पूर्णपणे बदलले असून ऐतिहासिक निर्णय घेताना हिंदू समाजाला केंद्रबिंदू मानून पावले उचलली जात आहेत. ‘जो हिंदू हित की बात करेगा, वही देश में राज करेगा’ हा विचार आज प्रत्यक्षात उतरताना दिसत असल्याचे त्यांनी नमूद केले.
धार्मिक स्थळांचा विकास आणि जागतिक सन्मान
पंतप्रधान मोदींच्या कार्यकाळात हिंदू धर्म आणि संस्कृतीला जागतिक पातळीवर सन्मानाचे स्थान मिळाल्याचे सांगत राणे यांनी अयोध्या राम मंदिर उभारणीचा उल्लेख केला. वर्षानुवर्षे न्यायालयात प्रलंबित असलेला हा प्रश्न दंगलमुक्त वातावरणात यशस्वीपणे सुटला असून आज तिथे भव्य राम मंदिर उभे राहिले आहे. यासोबतच उज्जैनचा महाकालेश्वर कॉरिडोअर आणि देशातील असंख्य महत्त्वाच्या धर्मस्थळांचा विकास करून सांस्कृतिक पर्यटनाला नवी दिशा देण्यात आल्याचे त्यांनी सांगितले. तसेच आंतरराष्ट्रीय पातळीवर परदेशी राष्ट्रप्रमुखांना ‘भगवद्गीता’ भेट देण्याची नवी आणि अभिमानास्पद परंपरा सुरू झाल्याचेही त्यांनी स्पष्ट केले.
कायदेविषयक सुधारणा आणि सुरक्षा
काँग्रेस सरकारच्या काळात वक्फ कायद्याच्या माध्यमातून झालेल्या कथित त्रुटींवर बोट ठेवत, पंतप्रधान मोदींनी वक्फ कायद्यात आवश्यक त्या सुधारणा करून हिंदू समाजाच्या जमिनी सुरक्षित करण्याचे काम केल्याचा दावा राणे यांनी केला. लव्ह जिहाद सारख्या संवेदनशील विषयांवर प्रशासनाने कडक भूमिका घेतली असून, देश समान नागरी कायद्याच्या दिशेने वाटचाल करत असल्याचे ते म्हणाले.
सुरक्षेचा दाखला देताना त्यांनी सांगितले की, २०१४ पूर्वी पाकिस्तान किंवा इतर संघटनांकडून होणाऱ्या हल्ल्यांना चोख उत्तर देण्याची हिंमत दाखवली जात नव्हती, पण आज भारताकडे वाकड्या नजरेने पाहण्याची कोणाचीही हिंमत नाही. ट्रिपल तलाक विरोधी कायद्यासारखे क्रांतिकारी निर्णय घेऊन मुस्लिम महिलांना न्याय मिळवून दिला गेल्याचेही त्यांनी नमूद केले.
तरुण शक्तीचा पाठिंबा
आज बांगलादेश किंवा पाकिस्तानातील हिंदूंसाठी जगात सर्वात सुरक्षित देश कोणता असेल, तर तो केवळ भारत आहे, ही भावना मोदींच्या कणखर नेतृत्वामुळेच निर्माण झाली आहे, असे राणे म्हणाले. देशातील तरुण वर्ग देशविघातक शक्तींच्या विरोधात आणि पंतप्रधानांच्या पाठीशी खंबीरपणे उभा आहे. सर्वाधिक काळ देशसेवा करण्याचा मान मिळवून नवा इतिहास रचल्याबद्दल सिंधुदुर्ग जिल्ह्याच्या वतीने त्यांनी पंतप्रधानांचे अभिनंदन केले आणि त्यांच्या नेतृत्वात भारत जागतिक पटलावर पहिल्या क्रमांकावर पोहोचेल, असा विश्वास व्यक्त केला. यावेळी भाजपचे जिल्हाध्यक्ष प्रभाकर सावंत, माजी जि.प. उपाध्यक्ष रणजीत देसाई, युवा मोर्चा जिल्हाध्यक्ष मिलिंद मेस्त्री उपस्थित होते.
संपादक
