साताऱ्यात विवाहित प्रेयसीकडून प्रियकराचा खून
सातारा/
साताऱ्यातील आगाशिवनगर येथे सोमवारी मध्यरात्री घरात घुसून वाद घालणाऱ्या प्रियकरावर विवाहित प्रेयसीने कुऱ्हाडीने हल्ला करून त्याची हत्या केली. या घटनेत राजेंद्र मरियप्पा कोळी (रा. कराड) यांचा मृत्यू झाला असून संशयित सारिका चंद्रकांत कोळी हिला पोलिसांनी ताब्यात घेतले आहे. वाद वाढल्यानंतर प्रेयसीने घरातील कुऱ्हाडीने वार केल्याचे सांगितले जाते. घटनेनंतर तिनेच डायल ११२ वर फोन करून पोलिसांना माहिती दिली. कराड शहर पोलिसांकडून पुढील तपास सुरू आहे.
याबाबत अधिक माहिती अशी कि, सदर आरोपी महिलेचे नाव सारिका चंद्रकांत कोळी (रा. इगवले वस्ती, आगाशिवनगर) असं आहे तर राजेंद्र मरीआप्पा काळे (वय ४५, रा. शिवाजी स्टेडियमच्या पाठीमागे, कराड) असं मृत प्रियकराचे नाव आहे. राजेंद्र आणि सारिका यांच्यात गेल्या काही काळापासून प्रेमसंबंध होते. परंतु मागील काही दिवसापासून त्यांच्या नात्यात दरी पडली होती. मुख्य म्हणजे सारिकाच्या चारित्र्याच्या संशयावरून दोघांमध्ये वादाची ठिणगी सातत्याने पडत होती.
मंगळवारी पहाटे तीन वाजण्याच्या सुमारास राजेंद्र हा सारिकाच्या घरी होता. याच दरम्यान, राजेंद्रने पुन्हा एकदा सारिकाच्या चारित्र्यावर संशय घेतला आणि इथेच सारिकाचे मस्तक फिरले. सातत्याने राजेंद्र संशय घेत असल्याने सारिकाला राग अनावर झाला आणि भर रात्रीच दोघात कडाक्याचे भांडण झालं. या भांडणाचे रूपांतर हाणामारीत झालं आणि रागाच्या भरात सारिकाने घरातील कुऱ्हाडीने राजेंद्रवर हल्ला केला.. सारिकाने सापासप वार करत राजेंद्रचा निर्घृण खून केला. राजेंद्रची हत्या करताच ती स्वतःच पोलिसांच्या स्वाधीन झाली. आणि या संपूर्ण प्रकरणाची माहिती दिली आहे.
या घटनेनंतर डीवायएसपी राजश्री पाटील, पोलीस निरीक्षक दत्तात्रय दराडे, गुन्हे प्रकटीकरण शाखेचे पोलीस उपनिरीक्षक निखिल मगदूम आणि त्यांच्या पथकाने तात्काळ घटनास्थळाचा पंचनामा केला. आरोपी महिला सारिकावर खुनाचा गुन्हा दाखल करण्याची प्रक्रिया सुरू आहे
संपादक
