रत्नागिरी जि.प. अध्यक्ष आज निवडणार
रत्नागिरी/ मेघेश मोंडकर
रत्नागिरी जिल्हा परिषदेच्या अध्यक्ष व उपाध्यक्ष पदासाठी आज निवड प्रक्रिया पार पडणार आहे. अध्यक्षपदी शिंदेसेनेच्या अस्मिता केंद्रे आणि नेत्रा ठाकूर यांची नावे चर्चेत असून, यांच्यापैकी कोणाच्या गळ्यात अध्यक्षपदाची माळ पडणार याची उत्सुकता आहे. तर उपाध्यक्षपदासाठी शिंदेसेनेचे माजी जिल्हाप्रमुख व जिल्हा परिषदेचे माजी सभापती विलास चाळके यांचे नाव निश्चित झाल्याची चर्चा सुरु आहे. जिल्हा परिषदेच्या ५६ गटांमध्ये शिंदेसेनेचे ४१ सदस्य, भाजपचे ४, राष्ट्रवादी (अजित पवार) आणि उद्धव सेना यांना प्रत्येकी ५, तर मनसेचा एक सदस्य आहे.. जिल्ह्यात महायुती असली तरी जिल्हा परिषदेवर शिंदेसेनेची एकहाती सत्ता स्थापन होणार आहे. त्यात अध्यक्षपदाचा मान उत्तर रत्नागिरी जिल्ह्याला मिळणार हे जवळपास निश्चित झाले आहे. मात्र, गुहागरातून जिल्हा परिषदेवर सलग तीन वेळा निवडून आलेल्या नेत्रा ठाकूर की मंडणगडमधून दुसऱ्यांदा निवडून आलेल्या अस्मिता केंद्रे अध्यक्षपदाच्य मानकरी ठरणार हे अजूनही गुलदस्त्यात आहे. दोघांपैकी कोणाच्या गळ्यात अध्यक्षपदाची माळ पडणार आहे, हे आज निश्चित होणार आहे.
संपादक
