महसूल मंत्री चंद्रशेखर बावनकुळे यांच्या मार्गदर्शनाखाली सिंधुदुर्गसह महाराष्ट्र सक्षम.. नितेश राणे
सिंधुदुर्गनगरी / देवयानी वरसकर
नितेश राणे म्हणाले, राज्याचे महसूल मंत्री चंद्रशेखर बावनकुळे यांच्या मार्गदर्शनाखाली राज्यातील प्रत्येक विधानसभा मतदारसंघात हे अभियान राबविण्यात येत आहे. सिंधुदुर्ग जिल्ह्यातील तिन्ही मतदारसंघांमध्येही नागरिकांना विविध शासकीय योजनांचा लाभ, दाखले आणि प्रमाणपत्रे देण्यात येत असून, लाभार्थ्यांच्या चेहऱ्यावरील समाधान हे शासनाच्या कार्यक्षमतेचे प्रतीक आहे.
प्रशासनाने वर्षभर याच गतीने, पारदर्शकतेने आणि लोकाभिमुख दृष्टिकोनातून काम केले तर शासनावरील नागरिकांचा विश्वास अधिक दृढ होईल, असे सांगत त्यांनी अधिकारी आणि कर्मचाऱ्यांनी नागरिकांशी संवेदनशीलतेने वागून त्यांच्या समस्या कमीत कमी वेळेत सोडविण्याचे आवाहन केले.
सिंधुदुर्ग जिल्हा प्रशासनाने गेल्या दीड-दोन वर्षांत अनेक वर्षांपासून प्रलंबित असलेले प्रश्न मार्गी लावले असून, शासनात अशक्य असे काहीच नसते, इच्छाशक्ती आणि प्रामाणिकपणा असेल तर प्रत्येक प्रश्नाचे समाधान होऊ शकते, असा विश्वास त्यांनी व्यक्त केला.
लोकप्रतिनिधींनी केंद्र व राज्य शासनाच्या सर्व योजनांचा सखोल अभ्यास करून त्या प्रत्येक पात्र नागरिकापर्यंत पोहोचवाव्यात, असे आवाहन करत त्यांनी लाभार्थी निवड पूर्णपणे पारदर्शक पद्धतीने व्हावी, यावर भर दिला. दुर्गम व डोंगराळ भागात ऑनलाइन सेवांमध्ये अडचणी येत असल्यास नागरिकांना लाभापासून वंचित ठेवू नये आणि आवश्यकतेनुसार ऑफलाइन प्रक्रियेलाही प्राधान्य द्यावे, असे निर्देश त्यांनी दिले.
यावेळी जिल्हाधिकारी, पोलीस प्रशासन, महसूल विभाग तसेच अभियान यशस्वी करण्यासाठी परिश्रम घेतलेल्या सर्व अधिकारी-कर्मचाऱ्यांचे त्यांनी विशेष कौतुक करून अभिनंदन केले.
संपादक
