शिरोड्यातील ताजच्या लक्झरी हॉस्पिटॅलिटी प्रकल्पासाठी त्रिपक्षीय करारावर स्वाक्षऱ्या
मुंबई /प्रतिनिधी
सिंधुदुर्गवासीयांनी १९९४ पासून पाहिलेले स्वप्न आता सत्यात उतरण्याच्या दिशेने एक महत्त्वाचा टप्पा पार पडला आहे. सिंधुदुर्ग जिल्ह्यातील शिरोडा-वेळागर येथे बहुप्रतीक्षित ‘ताज’ हॉटेल उभारणीचा मार्ग मोकळा झाला असून, या महत्त्वाकांक्षी लक्झरी हॉस्पिटॅलिटी प्रकल्पासाठी त्रिपक्षीय करारावर स्वाक्षऱ्या करण्यात आल्या आहेत. या प्रकल्पामुळे सिंधुदुर्गच्या पर्यटन विकासाला मोठी चालना मिळण्याची अपेक्षा आहे.
इंडियन हॉटेल्स कंपनी लिमिटेड (IHCL), महाराष्ट्र पर्यटन विकास महामंडळ (MTDC) आणि स्थानिक जमीनदारांच्या प्रतिनिधींमध्ये हा महत्त्वपूर्ण करार करण्यात आला. या करारामुळे शिरोडा-वेळागर येथील बहुप्रतीक्षित ताज हॉटेल प्रकल्पाच्या विकासासाठी आवश्यक प्रक्रिया पुढे नेण्याचा मार्ग मोकळा झाला आहे.
मत्स्यव्यवसाय व बंदरे मंत्री तसेच सिंधुदुर्गचे पालकमंत्री नितेश राणे यांनी हा प्रकल्प सिंधुदुर्गच्या विकासातील एक महत्त्वाचा नवा अध्याय असल्याचे म्हटले आहे. ताज हॉटेलच्या आगमनामुळे केवळ जिल्ह्यातील आतिथ्य क्षेत्राची पायाभूत सुविधा मजबूत होणार नाही, तर स्थानिक नागरिकांसाठी रोजगार आणि व्यवसायाच्या मोठ्या संधी निर्माण होतील. त्याचबरोबर सिंधुदुर्गचा भारताच्या पर्यटन नकाशावर अधिक ठळकपणे उदय होण्यास मदत होईल, असा विश्वास त्यांनी व्यक्त केला.
सिंधुदुर्गची स्वच्छ व निसर्गरम्य किनारपट्टी, समुद्रकिनारे, ऐतिहासिक किल्ले, घनदाट जंगले, जलमार्ग, समृद्ध समुद्री संस्कृती आणि गोव्याशी असलेली जवळीक या सर्व वैशिष्ट्यांमुळे जिल्ह्याला देशातील प्रमुख पर्यटन स्थळ म्हणून विकसित होण्याची मोठी क्षमता आहे. या पार्श्वभूमीवर शिरोडा-वेळागर येथे ताज हॉटेलसारख्या आंतरराष्ट्रीय दर्जाच्या हॉस्पिटॅलिटी प्रकल्पाची उभारणी महत्त्वपूर्ण मानली जात आहे.
या प्रकल्पामुळे जिल्ह्यातील विद्यमान पर्यटन पायाभूत सुविधांना पूरक सुविधा उपलब्ध होण्याची अपेक्षा आहे. उच्च दर्जाच्या निवास व आतिथ्य सुविधांमुळे देश-विदेशातील पर्यटकांना सिंधुदुर्गकडे आकर्षित करण्यास मदत होईल. त्यातून हॉटेल व्यवसायाबरोबरच पर्यटनाशी संबंधित वाहतूक, खाद्यपदार्थ, स्थानिक उत्पादने, हस्तकला, मार्गदर्शक सेवा आणि इतर पूरक व्यवसायांनाही चालना मिळू शकते.
स्थानिक पातळीवर रोजगारनिर्मिती हा या प्रकल्पाचा आणखी एक महत्त्वाचा परिणाम ठरण्याची शक्यता आहे. हॉटेल क्षेत्रातील थेट रोजगारासोबतच पर्यटनावर आधारित विविध व्यवसायांना अप्रत्यक्ष रोजगाराच्या संधी उपलब्ध होण्याची अपेक्षा आहे. त्यामुळे स्थानिक युवकांना जिल्ह्यातच रोजगाराच्या नव्या संधी मिळण्याचा मार्ग खुला होऊ शकतो.
शिरोडा-वेळागर परिसरातील या प्रकल्पामुळे सिंधुदुर्गच्या पर्यटन क्षमतेला मोठी बाजारपेठ मिळण्याची शक्यता आहे. विशेषतः उच्च दर्जाचे पर्यटन, लक्झरी हॉस्पिटॅलिटी आणि निसर्ग पर्यटन यांचा विकास झाल्यास जिल्ह्याच्या अर्थव्यवस्थेलाही त्याचा सकारात्मक फायदा होऊ शकतो.
या महत्त्वपूर्ण करारावेळी मुख्यमंत्री देवेंद्र फडणवीस, उपमुख्यमंत्री एकनाथ शिंदे व सुनेत्रा पवार, पर्यटन मंत्री शंभूराज देसाई, मत्स्यव्यवसाय व बंदरे मंत्री तथा सिंधुदुर्गचे पालकमंत्री नितेश राणे, सावंतवाडी-वेंदुर्लेचे आमदार दीपक केसरकर उपस्थित होते. तसेच इंडियन हॉटेल्स कंपनी लिमिटेडचे व्यवस्थापकीय संचालक व मुख्य कार्यकारी अधिकारी पुनीत छटवाल, महाराष्ट्र पर्यटन विकास महामंडळाचे व्यवस्थापकीय संचालक निलेश गटणे, वरिष्ठ सरकारी अधिकारी आणि संबंधित मान्यवरांच्या उपस्थितीत मंत्रालयात करारावर स्वाक्षऱ्या करण्यात आल्या.
सिंधुदुर्गवासीयांसाठी गेल्या अनेक वर्षांपासून प्रतीक्षेत असलेल्या या प्रकल्पामुळे जिल्ह्याच्या पर्यटन क्षेत्राला नवी दिशा मिळण्याची अपेक्षा आहे. ताजसारख्या नामांकित ब्रँडच्या माध्यमातून सिंधुदुर्गची ओळख देशाच्या तसेच आंतरराष्ट्रीय पर्यटन क्षेत्रात अधिक व्यापक होण्याची शक्यता आहे.
दरम्यान, या प्रकल्पामुळे सिंधुदुर्गच्या निसर्गसंपदेचे संवर्धन आणि स्थानिकांच्या हिताचा समतोल राखत पर्यटन विकासाला चालना मिळणे अपेक्षित आहे. योग्य नियोजन आणि स्थानिक सहभागातून हा प्रकल्प साकारल्यास सिंधुदुर्गच्या पर्यटन क्षेत्रासाठी तो मैलाचा दगड ठरू शकतो.
संपादक
