आणखीन एक लढाई कोल्हापूरकर जिंकलेत… माधुरी दोन दिवसांत नांदणी मठात येणार
कोल्हापूर /वृत्तसंस्था
नांदणी मठातील महादेवी उर्फ माधुरी हत्तीणीच्या घरवापसीचा मार्ग अखेर मोकळा झाल्याचे संकेत मिळत आहेत. माधुरी वनतारातून नांदणीच्या दिशेने रवाना होत असल्याची माहिती माजी खासदार राजू शेट्टी यांनी सोशल मीडिया पोस्टद्वारे दिली आहे. त्यामुळे माधुरीच्या घरवापसीची अनेक दिवसांपासून प्रतीक्षा करणाऱ्या नांदणीकरांमध्ये आनंदाचे वातावरण निर्माण झाले आहे.
नांदणी (ता. शिरोळ) येथील स्वस्तिश्री जिनसेन भट्टारक पट्टाचार्य संस्थान मठाच्या महादेवी उर्फ माधुरी हत्तीणीला पुन्हा नांदणीला आणण्यासाठी राजू शेट्टी यांनी सातत्याने पाठपुरावा केला. माधुरीच्या घरवापसीसाठी त्यांनी ४५ किलोमीटरची पदयात्रा केली होती. तसेच वनताराच्या सीईओंसोबत संवाद साधण्यासह न्यायालयीन लढाई आणि प्रशासनाकडे पाठपुरावा केला. अशी माहिती आपल्या पोस्ट द्वारे केली आहे.
दरम्यान, बुधवारी (ता. ९) माधुरी हत्तीणीच्या नांदणीला परत पाठविण्याच्या मागणीवर ऑनलाइन सुनावणी झाली. नांदणी मठ, वनतारा आणि महाराष्ट्र शासनाच्या वतीने उच्चस्तरीय समितीसमोर नांदणी मठात माधुरीसाठी उपलब्ध करून दिलेल्या सुविधांची माहिती सादर करण्यात आली. यावेळी माधुरीला नांदणीला पाठविण्याची मागणी करण्यात आली.
उच्चस्तरीय समितीने दोन्ही बाजूंचे म्हणणे ऐकून घेतल्यानंतर निकाल राखून ठेवला होता. त्यानंतर राजू शेट्टी यांनी माधुरी वनतारातून नांदणीच्या दिशेने निघाल्याची पोस्ट केली.
संपादक
