भारत ‘गॅस’ वर … इराणचा कतारमधील मुख्य प्लांट वर हल्ला
दोहा| वृत्तसंस्था
कतारमधील रास लफान इंडस्ट्रीयल सिटीमधील मोठ्या गॅस प्लांटवर इराणनं क्षेपणास्त्र हल्ला केला आहे. त्यामुळे तिथे भीषण आग लागली. उत्पादन थांबवण्याची वेळ आली. इस्रायलनं इराणच्या साऊथ पार्स गॅस फील्डवर हल्ला केल्यानंतर अवघ्या काही तासांनी इराणने कतार मधील गॅस प्लांटवर हल्ला चढवला. यानंतर इराणनं कतार, सौदी अरेबिया आणि यूएईलादेखील थेट धमकी दिली आहे. या देशांच्या ऊर्जा प्रकल्पांवरही इराणकडून हल्ला केला जाऊ शकतो.
कतारची गणना जगातील सर्वात मोठ्या एलएनजी निर्यातदार देशांमध्ये होते. त्यामुळे कतारच्या गॅस प्लांटवर हल्ला झाल्यानं जगभरात गॅसच्या किमती वाढण्याचा धोका आहे. भारतावर याचा सर्वाधिक परिणाम होऊ शकतो. कारण भारत आपल्या एकूण गरजेच्या जवळपास ४७ टक्के गॅस कतारमधून आयात करतो. भारत दरवर्षी २७ मिलियन टन एलएनजीची आयात करतो. यातील १२ ते १३ मिलियन टन एलएनजी कतारहून येतो. यासोबतच यूएईमधून २४ टक्के आणि अमेरिकेतून ११ टक्के गॅसची आयात होते.
कतारमधील गॅस उत्पादन दीर्घ कालावधीसाठी ठप्प राहिल्यास भारताला अन्य देशांकडून महाग गॅस आयात करावा लागले. याचा थेट परिणाम सर्वसामान्यांच्या खिशावर होईल. येत्या काळात स्वयंपाकाचा गॅस महाग होण्याची दाट शक्यता आहे. यासोबतच होर्मुझ सामुद्रधुनीतील वाढता तणावदेखील भारतासाठी चिंतेचा विषय आहे. भारताचे १० पेक्षा जास्त टँकर होर्मुझमध्ये अडकले आहेत. त
सध्या तरी देशात गॅसची कोणतीही टंचाई नसल्याचं सरकारकडून सांगण्यात आलं आहे. मध्य पूर्वेतील वाढत्या हल्ल्यांमुळे जगातील अनेक देशांसमोर ऊर्जा संकट आ वासून उभं राहिलं आहे. आधी केवळ सैनिकी तळांना, लष्करी आस्थापनांना लक्ष्य केलं जात होतं. पण आता इंधनाशी संबंधित प्रकल्पांवर हल्ले होऊ लागल्यानं चिंता वाढली आहे.
संपादक
