गोव्यासह महाराष्ट्रात आज पाऊस धुमाकूळ घालणार
मुंबई/ वृत्तसंस्था
राज्यात मान्सूनने पुन्हा जोर धरला असून आज अनेक भागांत मुसळधार पावसाची शक्यता हवामान विभागाने व्यक्त केली आहे. विशेषतः विदर्भ, मराठवाडा आणि कोकणातील घाटमाथा परिसरात पावसाचा जोर वाढण्याचा अंदाज असल्याने काही जिल्ह्यांसाठी ऑरेंज अलर्ट जारी करण्यात आला आहे. तर राज्यातील अनेक जिल्ह्यांना येलो अलर्ट देत नागरिकांनी सतर्क राहण्याचे आवाहन करण्यात आले आहे.
हवामान विभागाच्या अंदाजानुसार रायगड, जळगाव, पुणे घाटमाथा, सातारा घाटमाथा, कोल्हापूर घाटमाथा, छत्रपती संभाजीनगर, जालना तसेच विदर्भातील अमरावती, वर्धा, नागपूर, भंडारा, गोंदिया, चंद्रपूर आणि गडचिरोली जिल्ह्यांत जोरदार ते अतिजोरदार पावसाची शक्यता आहे. या पार्श्वभूमीवर या जिल्ह्यांसाठी ऑरेंज अलर्ट जारी करण्यात आला आहे.
याशिवाय ठाणे, मुंबई, रत्नागिरी, सिंधुदुर्ग, धुळे, नाशिक, बीड, परभणी आणि हिंगोली जिल्ह्यांत जोरदार सरींसह पावसाचा अंदाज असून येलो अलर्ट देण्यात आला आहे. पालघर, नंदूरबार, अहिल्यानगर, पुणे, सातारा, लातूर, नांदेड, बुलढाणा, अकोला, वाशीम आणि यवतमाळ जिल्ह्यांत विजांच्या कडकडाटासह वादळी पावसाची शक्यता वर्तवण्यात आली आहे.
संपादक
